Мэндчилгээ
“Эрдэнэс-Тавантолгой” ХК-ийн уурхайчид, нийт ажиллагсад, гэрээт олборлогчид, хувьцаа эзэмшигчид та бүхэндээ энэ өдрийн мэнд хүргэе.
2018 онд “Эрдэнэс-Тавантолгой” ХК төлөвлөсөн бүх зорилтуудаа 2-3 дахин давуулж биелүүлэн, олон үзүүлэлтээр улсдаа тэргүүлсэн билээ. Түүхэн хугацаандаа 40 сая тонн нүүрсээ бид 2018 оны 7-р сард олборлосон. Тэгвэл өнөөдөр бас нэг шинэ түүхийг бичиж, 50 сая дахь тонн нүүрсээ олборлолоо. Энэ бол Эрдэнэс-Тавантолгойгоор овоглосон нийт ажилтан албан хаагчид, тэр дундаа уурхайчдын маань хөдөлмөрийн үр шим юм. “Эрдэнэс-Тавантолгой” ХК-ийн болон гэрээт компанийн уурхайчдадаа энэ түүхт өдрийн мэндийг дахин дэвшүүлж, онцгойлон баяр хүргэе.
2019 оныг бид “Бүтээн байгуулалтын жил” болгон зарласан. Төрийн өмчит компаниудаас анх удаа олон хөрөнгийн зах зээлд хувьцаа гаргахаар УИХ, Засгийн газраас өгсөн үүрэг чиглэлийн дагуу шаргуу ажиллаж байна. IPO гаргах ажлыг амжилттай зохион байгуулах, тэр тусмаа цаг хугацааны хувьд нэг долоо хоног, нэг өдөр, нэг цагийн ч болов наана гаргахын тулд УУХҮ-ийн сайд, компанийн гүйцэтгэх удирдлагын баг хичээн зүтгэж байна. IPO гаргаснаар нүүрс угаах үйлдвэр, туузан дамжуургын систем, усан хангамж, кокс химийн үйлдвэр, авто болон төмөр зам гэх мэт томоохон төслүүдийн санхүүгийн эх үүсвэрийг бүрдүүлж, бүтээн байгуулалтын ажил эхлэнэ. Үүнээс гадна уурхайчдадаа зориулан орон сууцны хотхон, үр хүүхдүүд нь сурч боловсрох сургууль, цэцэрлэг барих ажлыг ч цаашид хийж хэрэгжүүлнэ. 2019 он “Эрдэнэс-Тавантолгой” ХК-ийн хувьд их бүтээн байгуулалт, хөгжил дэвшил шинэ түүхийн эхлэл байх болно. Хамтдаа олон сайхан түүх бүтээцгээе.
 
“Эрдэнэс-Тавантолгой” ХК ямагт “Сайн мэдээний уурхай” байх болтугай.
НИЙТЭЛСЭН: 2019-09-04 өдөр 14:53:5 цаг