Мэндчилгээ

Та бүхэнд энэ өдрийн мэнд хүргэе!
 
“Эрдэнэс Тавантолгой” ХК-ийн хувьцаа эзэмшигч иргэд, аж ахуйн нэгжүүд та бүхэндээ болон бүрэлдэхүүн компани, хамтран ажилладаг гэрээт, туслан гүйцэтгэгч, ханган нийлүүлэгч компанийн хамт олонд айлчлан ирж буй шинэ оны мэндийг дэвшүүлье. 
 
Улиран одож буй 2021 он “Эрдэнэс Тавантолгой” ХК-ийн хувьд амжилт бүтээл дүүрэн жил байлаа. Бид компанийн дунд хугацааны “А6-20” бизнес төлөвлөгөөгөө батлуулж энэ хүрээнд, Нүүрс баяжуулах үйлдвэр, Тавантолгойн нүүрс ачилт логистикийн төв, Холболтын төмөр зам, Загийн усны хоолойгоос ус дамжуулах шугамын зураг төсөл гэх мэт томоохон төсөл хөтөлбөрүүдээ эхлүүллээ.
 
2021 онд цар тахлаас үүдэлтэйгээр хүндхэн нөхцөл байдалтай тулгарсан ч эрсдэлийн төлөвлөгөө боловсруулж хэрэгжүүлснээр 705.8 сая ам.долларын борлуулалтын орлоготой ажиллаж компанийн ТУЗ-өөс тодотгон баталсан төлөвлөгөөг 100.5 хувиар давуулан биелүүллээ. 
 
Ингэснээр төсөл хөтөлбөрүүдээ санхүүжүүлэхийн зэрэгцээ хувьцаа эзэмшигч иргэдийнхээ тусын тулд зарим нийгмийн чанартай ажил, арга хэмжээг ч мөн санхүүжүүлэв. 
 
Компани нийгмийн хариуцлагын хүрээнд коронавируст халдвар /Ковид-19”/-ын тархалттай тэмцэхэд зориулж 29.2 тэрбум төгрөгийн санхүүжилтийг эрүүл мэндийн салбарт оруулжээ. Үүгээр зогсохгүй ажилчид өөрсдийн санаачилгаар “Хүүхдэд ээлтэй – ЭТТ” хөтөлбөрийг хэрэгжүүлэн “Зүрх мартахгүй”, “Энгийн мөрөөдөл” төслүүдэд хөрөнгө орууллаа. 
 
Бид цаашид дунд хугацааны бизнес төлөвлөгөөгөө хэрэгжүүлэн 10.1 их наядын хөрөнгө оруулалттай, 50 их наядын үнэлгээтэй, Монголдоо төдийгүй Азидаа тэргүүлэгч аж ахуйн нэгж болох зорилт тавин ажиллаж байна. 
 
Та бүхэнд сайн сайхныг хүсье. 
 
"ЭРДЭНЭС ТАВАНТОЛГОЙ" ХК-ИЙН ГҮЙЦЭТГЭХ ЗАХИРАЛ Б.ГАНХУЯГ
 
E-mail: gankhuyag@erdenestt.mn
Twitter: @Bat_Gankhuyag 
Facebook: Bat Gan (Б.Ганхуяг)